【明報專訊】從事銀行業嘅金融界議員陳振英（Ronick，圖），係今年其中一名議會新丁，佢噚日同傳媒茶敘，就以從商比喻從政，形容兩者每日都有不可預測嘅事。原來SARS期間，Ronick有下屬中招，同事都好擔心，Ronick就用不同方法穩定軍心。噚日立法會會議以衝突收場，Ronick話無被嚇親，但覺得呢個月立法會發生嘅事，好多都估唔到。
中銀秘書轉任顧問
Ronick曾經擔任中銀香港董事秘書，近日已經轉任顧問。至於從政同從商有咩分別，佢就話從商可以有業績表，但從政就較難評估實效，要由市民評價，又透露以往打工時，會打定封辭職信喺櫃桶底，但做議員就唔可以隨時唔撈喇。
金管局總裁陳德霖近日又被傳可能參選特首，本報都收到消息話係流料一則；Ronick話日前同對方傾過金融事務，但無提特首選舉。佢講笑話，金融市場好多傳聞都「匪夷所思」，政界傳聞亦然。
